راولپنڈی کے شہریوں کیلئے خوشخبری ؛اورنج لائن میٹرو بس صدرمیٹرو روٹ کو بھی منسلک کرنے کی ہدایت

اسلام آباد(اے ایف بی)وزیراعظم محمدشہباز شریف نے ہدایت کی ہے کہ اورنج لائن میٹرو بس کے ساتھ راولپنڈی صدر اور اسلام آباد سیکرٹریٹ کی طرف سے میٹرو روٹ کو بھی منسلک کیا جائے، پشاور موڑ سے اسلام آباد ایئرپورٹ تک میٹرو روٹ کو منسلک کرنے کیلئے فیض احمد فیض سٹیشن پر جنکشن پیر تک تیار اور نئے روٹ سے منسلک ہو جائے گا۔ جمعرات کو وزیراعظم میڈیا آفس سے جاری بیان کے مطابق وزیراعظم شہباز شریف کی طرف سے افتتاح کے بعد فی الوقت اورنج لائن میٹرو پشاور موڑ پر این ایچ اے سٹیشن سے ایئرپورٹ تک فعال ہے۔ وزیراعظم نے چیئرمین سی ڈی اے کو ہدایت کی ہے کہ وہ اورنج لائن کے ساتھ راولپنڈی صدر اور اسلام آباد سیکرٹریٹ کی طرف سے میٹرو روٹ کو بھی منسلک کریں، اس کیلئے فیض احمد فیض بس سٹیشن پر ایک جنکشن تیار کیا جا رہا ہے جو پیر تک تیار ہو جائے گا۔ پیر سے راولپنڈی کے مسافر وزیراعظم کی ہدایات کے نتیجے میں ہوائی اڈے کے کنکشن کے ساتھ ساتھ اورنج لائن کے ذریعے گولڑہ اور نسٹ سے لنک بھی استعمال کر سکیں گے۔ یہ وزیراعظم شہباز شریف کی طرف سے راولپنڈی اسلام آباد کے عوام کیلئے بڑا تحفہ ہے۔