اورکزئی ،سکیورٹی فورسز کاآپریشن، لیفٹیننٹ کرنل ،میجرسمیت 11 جوان شہید،19دہشتگرد ہلاک

راولپنڈی ( اے ایف بی)سکیورٹی فورسز کی جانب سے اورکزئی میں انٹیلی جنس بیسڈ آپریشن کیا گیا، مقابلے میں لیفٹیننٹ کرنل اور سیکنڈ ان کمانڈ میجر سمیت 11 جوان شہید ہو گئے جبکہ 19دہشتگرد ہلاک ہو گئے۔پاک فوج کے شعبہ تعلقات عامہ( آئی ایس پی آر) کے مطابق انٹیلیجنس بیسڈ آپریشن 7 اور 8 اکتوبر کی درمیانی شب کیا گیا، آپریشن کے دوران 11 بہادر جوانوں نے جام شہادت نوش کیا۔آئی ایس پی آر نے کہا کہ کارروائی دہشتگردوں کے ٹھکانے پر کی گئی، سکیورٹی فورسز کی موثر کارروائی میں 19 دہشتگرد ہلاک کئے گئے،آئی ایس پی آر کے مطابق آپریشن کے دوران دہشتگردوں کے قبضے سے بھاری مقدار میں اسلحہ، گولہ بارود اور مواصلاتی آلات بھی برآمد کئے گئے ۔ آئی ایس پی آر کے مطابقدہشت گردوں کی شدید فائرنگ کے تبادلے میں راولپنڈی کے رہائشی 39 سالہ لیفٹیننٹ کرنل جنید عارف اور ان کے 33 سالہ نائب میجر طیب راحت نے بہادری سے آپریشن کی قیادت کرتے ہوئے جامِ شہادت نوش کیا۔ شہید میجر طیب راحت بھی راولپنڈی کے رہائشی تھے۔ شہید ہونے والے ان بہادر سپاہیوں میں ضلع خیبر کے رہائشی 38 سالہ نائب صوبیدار اعظم گل، ضلع کرم کے رہائشی 35 سالہ نائیک عادل حسین، ضلع ٹانک کے رہائشی 34 سالہ نائیک گل امیر، ضلع مردان کے رہائشی 31 سالہ لانس نائیک شیر خان، ضلع مانسہرہ کے رہائشی 32 سالہ لانس نائیک طالش فراز شامل ہیں۔ان کے علاوہ ضلع کرم کے رہائشی 32 سالہ لانس نائیک ارشاد حسین، ضلع مالاکنڈ کے رہائشی 28 سالہ سپاہی طفیل خان، ضلع صوابی کے رہائشی 23 سالہ سپاہی عاقب علی اور ضلع ٹانک کے رہائشی 24 سالہ سپاہی محمد زاہد شامل ہیں ۔آئی ایس پی آر کا بتانا ہے کہ اورکزئی کے علاقے میں کلیئرنس آپریشن جاری ہے، پاکستانی فورسز بھارتی سرپرستی میں چلنے والی دہشت گردی کے خاتمے کے لیے پرعزم ہیں، شہدا کی قربانیاں دہشت گردی کے خلاف عزم کو مزید مضبوط بناتی ہیں۔