لاہور سمیت پنجاب بھر میں نیو ایئر نائٹ کیلئے سخت سکیورٹی پلان تیار، خلاف ورزی پر سزاؤں کا اعلان

لاہور ( اے ایف بی) ملک میں نیو ایئر نائٹ پر لاہور سمیت پنجاب بھر میں امن و امان برقرار رکھنے کے لیے پولیس نے جامع سکیورٹی پلان مکمل کرلیا، سخت سکیورٹی پلان تیار کرتے ہوئے خلاف ورزی پر سزاؤں کا اعلان کردیا گیا، پنجاب پولیس نے شہریوں سے اپیل کی ہے کہ کسی بھی مشکوک سرگرمی، ون ویلنگ یا ہوائی فائرنگ کی اطلاع فوری طور پر ہیلپ لائن 15 پر دیں تاکہ بروقت کارروائی ممکن بنائی جا سکے۔میڈیا رپورٹس کے مطابق آئی جی پنجاب ڈاکٹر عثمان انور نے صوبہ بھر میں سکیورٹی ہائی الرٹ رکھنے اور تمام فیلڈ فارمیشنز کو مکمل طور پر چوکس رہنے کی ہدایات جاری کر دی ہیں، نیو ایئر نائٹ پر صوبہ بھر میں 25 ہزار سے زائد پولیس افسران اور اہلکار سیکیورٹی ڈیوٹی انجام دیں گے، جبکہ صرف لاہور میں 5 ہزار سے زائد پولیس اہلکار تعینات کیے جائیں گے، تعینات کی جانے والی نفری میں 419 انسپکٹرز، 1 ہزار 267 سب انسپکٹرز، 2 ہزار 189 اسسٹنٹ سب انسپکٹرز، 1 ہزار 408 ہیڈ کانسٹیبلز اور 16 ہزار 977 کانسٹیبلز شامل ہیں۔انہوں نے بتایا کہ لاہور سمیت پورے صوبے میں سی سی ٹی وی کیمروں کے ذریعے تمام سرگرمیوں کی کڑی مانیٹرنگ کی جائے گی، پولیس کو ہدایت دی گئی ہے کہ ملک دشمن عناصر، مشکوک افراد اور قانون شکنی میں ملوث عناصر پر خصوصی نظر رکھی جائے، نیو ایئر نائٹ کے دوران ون ویلنگ، ہوائی فائرنگ اور ہلڑ بازی پر مکمل پابندی عائد ہوگی، خواتین اور شہریوں کو ہراساں کرنے والے شرپسند عناصر کے خلاف فوری کارروائی کرتے ہوئے انہیں حوالات میں بند کیا جائے گا۔بتایا گیا ہے کہ نیو ایئر نائٹ پر ٹریفک کے مربوط اور مؤثر انتظامات یقینی بنانے کا بھی حکم دیا گیا ہے، ڈولفن سکواڈ، پیرو، ایلیٹ فورس اور پنجاب ہائی وے پٹرولنگ کی پٹرولنگ میں اضافہ کیا جائے گا، لاہور سمیت صوبے کے تمام شہروں میں سرچ اینڈ سویپ آپریشنز بھی جاری رکھے جائیں گے، گزشتہ برس ریکارڈ یافتہ ون ویلرز اور ہوائی فائرنگ میں ملوث ملزمان سے پیشگی ضمانتی مچلکے بھی حاصل کیے جائیں گے، سی سی پی او لاہور، آر پی اوز اور ڈی پی اوز کو اپنے اپنے علاقوں میں سیکیورٹی انتظامات کی خود نگرانی کی ہدایت کی گئی ہے۔