انسدادِ دہشتگردی کیلئے نیکٹا اور صوبوں کے درمیان کوآرڈینیشن بہتر بنانے کا فیصلہ
اسلام آباد (اے ایف بی ) حکومت نے انسدادِ دہشتگردی کیلئے نیکٹا اور صوبوں کے درمیان کوآرڈینیشن بہتر بنانے کا فیصلہ کرلیا۔ تفصیلات کے مطابق وفاقی وزیرِ داخلہ محسن نقوی کی زیرِ صدارت نیشنل ایکشن پلان کی کوآرڈینیشن کمیٹی کا اجلاس ہوا، اجلاس میں نیکٹا اور صوبوں کے درمیان کوآرڈینیشن بہتر بنانے کا فیصلہ کیا گیا۔اجلاس میں شرکاء کو بریفنگ دی گئی کہ رواں سال اکتوبر تک 7 ہزار 984 انٹیلی جنس بیسڈ آپریشنز میں 206 دہشتگرد ہلاک کیے گئے، سوشل میڈیا پر کالعدم دہشت گرد تنظیموں کی سرگرمیوں کی روک تھام کے لیے جامع اقدامات کیے جائیں گے، پی ٹی اے کے تعاون سے دہشت گرد گروپوں کے اکاؤنٹ کو بلاک کیا جائے گا، آئندہ اجلاس میں پی ٹی اے سمیت تمام متعلقہ اداروں کے حکام کو مؤثر میکنزم پیش کرنے کی ہدایت کی گئی۔اس موقع پر گفتگو کرتے ہوئے محسن نقوی نے کہا کہ نیکٹا دہشتگردی کے خلاف جنگ میں قائدانہ کردار ادا کرے گی، نیکٹا میں اصلاحات کا آغاز کر دیا ہے، اصل رول بحال کیا جا رہا ہے، مؤثر کوآرڈینیشن کے لیے نیشنل فیوژن سینٹر قائم کر دیا گیا ہے، بلوچستان، خیبر پختونخواہ میں دہشت گردی کے واقعات انتہائی افسوسناک اور قابل مذمت ہیں، دہشتگردی سے نمٹنے کیلئے پولیس، فرنٹیئر کانسٹیبلری کو مضبوط کیا جائے گا، امن و امان کی صورتِ حال بہتر بنانے کے لیے سب کو مل کر کام کرنا ہے، استعداد کار بڑھانے اور تمام صوبوں کی پولیس کو جدید ٹیکنالوجی سے آراستہ کرنا ہے۔بتایا گیا ہے کہ اجلاس میں وزیرِ داخلہ محسن نقوی نے قانون نافذ کرنے والے اداروں کی ضروریات ترجیحی بنیادوں پر پوری کرنے کا اعلان کرتے ہوئے 7 روز میں تمام اداروں کو ضروریات سے متعلق رپورٹ وزارت داخلہ کو بھجوانے کی ہدایت کردی۔
