دبئی میں نیا قانون متعارف؛ گمشدہ اشیاء جمع کروانے پر 50 ہزار درہم تک انعام

دبئی (اے ایف بی) دبئی میں نیا قانون متعارف کروادیا گیا جس کے تحت گمشدہ اشیاء ملنے پر پولیس سٹیشن میں جمع کروانے والے تعریفی سرٹیفکیٹ، اس چیز کی مجموعی کی قیمت کے 10 فیصد زیادہ سے زیادہ 50 ہزار درہم کی حد تک کا مالی انعام حاصل کرسکتے ہیں۔ خلیجی میدیا کے مطابق دبئی نے گمشدہ اور لاوارث اشیاء کو آسان، بہتر اور زیادہ فائدہ مند طریقے سے سنبھالنے کے لیے ایک نیا قانون متعارف کرایا ہے، اس سلسلے میں متحدہ عرب امارات کے نائب صدر، وزیر اعظم اور دبئی کے حکمران شیخ محمد بن راشد آل مکتوم نے منگل 25 نومبر کو 2025 کے قانون نمبر 17 کا اعلان کیا، یہ قانون سرکاری گزٹ میں شائع ہونے کے دن سے نافذ العمل ہوجائے گا۔بتایا گیا ہے کہ اس اقدام کا مقصد گم شدہ اور ملی ہوئی اشیاء کے عمل کو مزید شفاف بنانا اور شہر بھر میں ایمانداری کو فروغ دینا ہے، اس قانون میں جہاں خلاف ورزی کرنے والوں کے لیے 2 لاکھ درہم تک کے جرمانے ہیں، وہیں گمشدہ اشیاء ملنے پر پولیس سٹیشن میں جمع کروانے والوں کو 50 ہزار درہم تک انعام بھی ملے گا، قانوں کے تحت مالکان کو اپنی گمشدہ اشیاء دوبارہ حاصل کرنے کے حقوق کی ضمانت دی گئی ہے۔معلوم ہوا ہے کہ نئے قانون کے تحت دبئی پولیس کسی بھی گمشدہ اشیاء کو حاصل کرنے، اس کی حفاظت کرنے اور اس کی تفتیش میں کلیدی کردار ادا کرے گی، جس میں مکمل تفصیل کا حصول، تاریخوں، مقامات اور تلاش کرنے والے کی تفصیلات کو نوٹ کرنا شامل ہے، اتھارٹی کو تمام گمشدہ اور لاوارث املاک کو ریکارڈ کرنے کے لیے ایک الیکٹرانک نظام قائم کرنے کی ہدایت کی گئی ہے، دبئی پولیس کے لیے سٹوریج کے اخراجات کا تعین کرنا، عوامی اعلانات کا انتظام کرنا اور گمشدہ ملی ہوئی چیزوں کی نگرانی کرنا بھی ضروری قرار دیا گیا ہے۔بتایا جارہا ہے کہ دبئی پولیس اس قانون یا اس کے فیصلوں کی خلاف ورزی کرنے والے کسی بھی شخص کو تحریری انتباہ جاری سکتی ہے، جس میں ان سے ایک مقررہ تاریخ کے اندر خلاف ورزی کو درست کرنے کا مطالبہ کیا جا سکتا ہے، جس مین ناکامی کی صورت میں جرمانے کیے جائیں گے جو 500 درہم سے ایک لاکھ درہم تک ہوں گے، ایک سال کے اندر بار بار خلاف ورزیوں پر اس کو دگنا کرتے ہوئے 2 لاکھ درہم تک جرمانہ ہوگا۔