ایشیا کپ: بھارتی میڈیا کی خبریں بے بنیاد، موقف پر قائم، مطالبہ مسترد نہیں ہوا، پی سی بی

لاہور( اے ایف بی ) پاکستان کرکٹ بورڈ نے میچ ریفری سے متعلق بھارتی میڈیا کے دعوے کو مسترد کردیا۔بورڈ ذرائع نے کہا ہے کہ آئی سی سی کی جانب سے کوئی جوابی خط موصول نہیں ہوا، پاکستان کا مطالبہ مسترد ہونے کی خبریں بے بنیاد ہیں، پاکستان کرکٹ بورڈ معاملے پر اپنے موقف پر قائم ہے۔قبل ازیں بھارتی میڈیا نے دعویٰ کیا تھا کہ آئی سی سی نے پاکستان کی جانب سے میچ ریفری اینڈی پائی کرافٹ کو ہٹانے کی درخواست مسترد کر دی ہے، اس حوالے سے پاکستان کرکٹ بورڈ (پی سی بی) کو آگاہ بھی کر دیا گیا ہے۔بھارتی ویب سائٹ نے دعویٰ کیا تھا کہ آئی سی سی نے پاکستان کے اس مؤقف کو بھی تسلیم نہیں کیا کہ میچ ریفری نے بھارتی ٹیم کے دباؤ پر متنازع اقدام کیا، گراؤنڈ میں موجود ایشین کرکٹ کونسل کے رکن نے ہی پائی کرافٹ کو “ہینڈ شیک” نہ کرنے کے حوالے سے کہا تھا۔میڈیا رپورٹس کے مطابق پائی کرافٹ کو پورے ایشیا کپ سے ہٹانے کے بجائے صرف پاکستان کے میچز سے الگ کرنے پر غور کیا جا رہا ہے اور ان میچز میں سابق ویسٹ انڈین کرکٹر رچی رچرڈسن کو میچ ریفری مقرر کرنے کا امکان ہے۔