بابراعظم;معاملہ ختم کرنے کےلئے 20لاکھ روپے کی پیشکش،حامیزہ کادعویٰ

لاہور(اے ایف بی) قومی ٹیم کے کپتان بابراعظم پر الزامات لگانے والی خاتون حامیزہ مختار نے دعویٰ کیا ہے کہ کرکٹر کی فیملی نے معاملہ رفع دفع کرنے کے لئے 20 لاکھ روپے کی پیشکش کی ،بابراعظم کی فیملی نے تھرڈ پارٹی کے ذریعے پیسوں کی پیشکش کی ۔ نجی ٹی وی کے مطابق حامیزہ مختار نے دعوی کیا ہے کہ اسے بابراعظم کی فیملی نے معاملے کو رفع دفع کرنے کے لیے 20 لاکھ روپے کی پیشکش کی ہے ۔

حامیزہ کا کہنا ہے کہ اس نے تمام ریکارڈ اور دوسرا موبائل بھی ایف آئی اے میں جمع کرا دیا ہے۔ یاد رہے کہ پاکستان کرکٹ ٹیم کے کپتان بابراعظم نے اپنے خلاف سیشن عدالت کی جانب سے مقدمہ درج کرنے کا فیصلہ لاہور ہائی کورٹ میں چیلنج کر دیا ہے۔ لاہور ہائی کورٹ میں داخل کرائی گئی درخواست میں بابراعظم نے ایف آئی اے اور الزامات لگانے والی خاتون حامیزہ مختار کو فریق بنایا ہے۔درخواست میں مؤقف اپنایا گیا کہ بابراعظم قومی کرکٹ ٹیم کے کپتان اور بہترین کھلاڑی ہیں جو کئی بین الاقوامی ریکارڈز اپنے نام کر چکے ہیں۔

درخواست گزار کے مطابق مقدمہ درج کرنے سے قبل ان کا مؤقف نہیں سنا گیا۔ درخواست میں مزید کہا گیا ہے کہ بابر اعظم معصوم ہیں اور ہائی کورٹ سے انصاف مانگ رہے ہیں۔ درخواست گزار کے مطابق اعلیٰ عدالتوں کے فیصلوں کے خلاف سیشن کورٹ نے مقدمہ درج کرنے کا حکم دیا ہے۔ عدالت سے درخواست کی گئی ہے کہ سیشن کورٹ کے مقدمہ درج کرنے کے فیصلے کو کالعدم قرار دیا جائے اور درخواست کے حتمی فیصلے پر مقدمہ درج کرنے کے فیصلے کو معطل کیا جائے۔

اپنا تبصرہ بھیجیں

Protected with IP Blacklist CloudIP Blacklist Cloud